Udako oporrak joan dira eta denok gure eginbeharretara itzuli gara. Lanera edo eskoletara itzultzearekin batera egunak uzten dizkigun tarte libre horietan egiten ditugun ekintzak ere berreskuratu ditugu. Lanegunetan izaten dugun aisialdirako tarte laburra ariketa fisikoari, kirolari eskaintzen diogunon multzoa zabala da oso. Aitortuko dizuet poza sentitzen dudala gazte eta ez hain gazteak, entrenamendu saioetan ikusten ditudanean, Oria ibaian arraunean (irudi ederra eskaintzen digute gainera), Berazubiko pistan saltoka eta lasterka, Artzabaltza (Izaskungo eta Villabonako bideak ahaztu gabe) inguruan paseoan (Uzturrera egunero igotzen direnak ere badira) eta korrika –Behobia-Donostia lasterketak bazter guztiak lasterkariz betetzen ditu!- txirrinduz batera eta bestera, dantzan toki ezberdinetan, Kiroldegian eta ikastetxeetan futbola, saskibaloia, judoa, igeriketa...
Pozgarria da bai, aberastuko dituen jarduerak egiten horrenbeste jende ikustea.
Honekin lotuta eta mugikortasunaren astea dela eta, honako galdera hau etorri zait burura: horren herri kirolzalea izanik zergatik ez dugu txirrindua garraio moduan gehiago erabiltzen? Gure herri eta bideetan autoa jaun eta jabe izan da azken 25 urteetan, hala ere, badirudi azken aldian oinezkoentzako eta txirrindularientzako toki gehiago bilatzen ari direla administrazio ezberdinetatik (espaloiak eta oinezkoentzako eremuak zabaldu eta bide gorriak egiten ari dira) Dena den zenbait tokietan polemika ugari sortu duten obrak izan dira: alde batetik kotxeak aparkatzeko toki gutxiago dagoela diote batzuk; nik, aukeran, nahiago ditut oinezkoentzako eremu gehiago nahiz eta automobilak urrutiago utzi behar. Eta bestetik oinezkoak eta txirrindulariak partekatu behar dituzten atalek -Tolosan egiten ari den bide gorriaren atal ugari horrela egiten ari dira- sortu dute eztabaida. Konponbidea sinplea izanik ere ez dakit erraza egingo ote zaigun betetzea, oinez goazenean bide gorriari erreparatu eta libre utzi behar dugu eta txirrinduz goazenean berriz mantso eta adi joan behar dugu.
Mugikortasun jasangarriagoa lortzeko bideetatik bat hau litzateke, oinez zein bizikletaz mugitzeko aukerak erraztu eta beste bat, garraio publikoa hobetu, ugaritu eta merkeagoa jarriz, txirrinduak garraio publikoan eramateko erraztasunak ematea ahaztu gabe; era horretan txirrinduz egiteko luzeegia izan daitekeen bidaia garraio publikoan egin ahal izango genukeen eta goazen tokira iritsita txirrinduz mugituko ginateke.
Oinez, txirrinduz zein garraio publikoan mugitzeak ingurugiroari mesede egiteaz gain, guri ere osasuna eta patxada handiagoa emango digu.
2007ko iraila
No comments:
Post a Comment